Che Guevara

Dr Ernesto Rafael Guevara de la Serna, bekannt as Che Guevara [t͡ʃe ge'vara] oder äifach Che (* offiziell 14. Juni 1928, villicht scho 14. Mai 1928^[1] z Rosario, Argentinie; † 9. Oktober 1967 z La Higuera, Bolivie), isch e marxistische Politiker, Guerillafüerer und Autor gsi.

Er isch äine vo de wichdigste Aafüerer (Comandante) vo dr Rebellenarmee vo dr Kubanische Revoluzioon vo 1956–59 gsi und isch näben em Fidel Castro die wichdigsti Sümbolfigur vo dr Revoluzioon. Dr Guevara stammt us ere argentinische bürgerlige Familie. Won er no Medizin studiert het, het er Räisedaagebüecher verfasst, wo literarischi Kwalidäät häi und e baar mol verfilmt worde si. Äinzelni vo sine Schrifte und Reede häi revoluzionäri Ströömige wit über Kuba uuse beiiflusst. Si Lääbe, si Dood und dr posthumi Kult um sini Person si s Thema von e Hufe Film und Büecher.

D amerikanischi Zitschrift Time Magazine het en 1999 zu de 100 iiflussriichste Lüt im 20. Joorhundert zelt.^[2] E Fotografii vom „Che“ vom Alberto Korda, Guerrillero Heroico, gältet as s berüemtiste fotografische Bild von ere Person,^[3] und ghöört zu de Medieikone.

1. ↑ Lueg d Geburtsurkunde aa.
2. ↑ Ariel Dorfman: CHE GUEVARA: The Guerrilla. In: Time Magazine, 14. Juni 1999 (änglisch).
3. ↑ Che Guevara photographer dies. In: BBC News, 26. Mai 2001 (änglisch).